Ef tryggð íbúa við bæjarfélagið sitt væri mæld myndu Hafnfirðingar slá öll met. Hafnarfjörður á sinn eigin miðbæ með verslunum og veitingastöðum. Þar er líka ýmislegt til að auðga andann. Kvikmyndasafn Íslands og Gaflaraleikhúsið eiga heima í Hafnarfirði og Hafnarborg er spennandi listasafn í hjarta bæjarins. Þar eru haldnar sýningar með fremstu listamönnum samtímans og haldnir ýmsir viðburðir bæði fyrir börn og fullorðna. Við höfnina eru meðal annars vinnustofur listamanna og má með sanni segja að menningarlíf Hafnarfjarðar blómstri. Í Hafnarfirði eru þrjár sundlaugar. Sundhöllin, Suðurbæjarlaug og Ásvallalaug sem er bæði keppnislaug og þar er einnig einstaklega góð barnalaug og pottar og ein af örfáum innivatnsrennibrautum landsins.